Day 10

 هلو♡

وصلت صفحة 321، ضايعة انا ضايعة، فلسفة الرواية غريبة، تعاملها وي الموت مخيف و دقة الكاتب بالسرد تخبل.

كلما يذكر اسم اغنية اروح ابحث عنها، وبعدين طلع اسم الرواية على اسم اغنية للبيتلز. المهم حلوة وتحسسني الجو شتا وجاي تمطر.

تحمست أزور اليابان. وصف الجبال والطبيعة خبلني. بكل الأحوال، جاي اعاني شوي من ناحية القراءة، مثلا اول امس قريت هيج 40 صفحة بس، اليوم الوراه قريت 75 ضبط، واليوم قريت اكثر من 100 صفحة واشك رح اكمل الرواية اليوم. ما بقى بيها بس فقرة وحدة.

المهم، الي يطي هالة غامضة وحلوة للبطل هو انو هو يدرس مسرح، ما تمر جم صفحة بدون ميحجي عن الالهة اليونانية وسالفة "انزال الاله بالآلة"، المفهوم حلو؛ يحجي انو شلون الناس ضايعين بحياتهم ويصلون لطريق مسدود بعدين يظهر إله يحل كل مشاكلهم.

وها، شي حلو ثاني، انو اكو رسائل هواي بين ناوكو (البطلة) و واتانابي (البطل)، احب هذا الفن الأدبي، هلشي حيخليني اكتب رسائل أفضل و أحلا.

المهم متحمسة ابدي بكتاب جديد باجر:)

خلاروح أتعشى، يارب متطفى الكهرباء